Psa 76 | KikGKY | STEP | Thaburi ya Asafu Kũu Juda Ngai nĩoĩkaine; rĩĩtwa rĩake nĩ inene thĩinĩ wa Isiraeli.

Psalms 76

Jehova Nĩwe Ngai wa Jakubu

Thaburi ya Asafu

1 Kũu Juda Ngai nĩoĩkaine;
rĩĩtwa rĩake nĩ inene thĩinĩ wa Isiraeli.
2 ^aHema yake ĩrĩ kũu Salemu,
gĩikaro gĩake kĩrĩ Zayuni.
3 ^bKũu nĩkuo oinangĩire mĩguĩ ya ũta ĩkũhenia,
akiunanga ngo na hiũ ciao cia njora,
o na indo ciao ciothe cia mbaara.

4 Wee ũcangararĩte nĩ ũtheri,
ũkagĩa na ũkaru gũkĩra irĩma irĩ na ũtonga wa nyamũ cia iguĩma.
5 ^cAndũ arĩa njamba magwĩte magatunywo indo,
magakoma toro wao wa gĩkuũ;
gũtirĩ o na ũmwe wa njamba cia ita
ũngĩambararia moko make.
6 Nĩ ũndũ wa ikũũma rĩaku, Wee Ngai wa Jakubu,
mbarathi o ũndũ ũmwe na ngaari cia ita igwĩte thĩ ikaaga kwĩigua.
7 ^dWee nowe wa gwĩtigĩrwo.
Nũũ ũngĩrũgama mbere yaku rĩrĩa ũrĩ mũrakaru?
8 ^eWamenyithanirie itua rĩaku ũrĩ o kũu igũrũ,
nayo thĩ ĩgĩĩtigĩra na ĩgĩkira ki,
9 ^frĩrĩa Wee Ngai, warũgamire ũtuanĩre ciira,
nĩguo ũhonokie arĩa othe anyamaarĩku a bũrũri.

10 Ti-itherũ mangʼũrĩ ma andũ nĩmagakũgoocithia,
na ũkeyoha matigari ma mangʼũrĩ maku ta mũcibi.

11 ^gMwĩhĩtei mĩĩhĩtwa harĩ Jehova Ngai wanyu na mũmĩhingie;
rekei mabũrũri marĩa mothe mũriganĩtie namo
marehere ũcio wa gwĩtigĩrwo iheo.
12 Athuthaga roho wa arĩa maathanaga;
etigagĩrwo nĩ athamaki a thĩ.